Հայաստանի պետական մանկավարժական համալսարանն արժանացավ «Ակադեմիական առաջամարտիկ» մրցանակին

Ուզբեկստանի Սամարղանդ քաղաքում, ՖԻԴԵ-ի 46-րդ շախմատի օլիմպիադայի և կոնգրեսի շրջանակում, տեղի ունեցավ «Շախմատը կրթության մեջ» խորագրով գագաթնաժողով, որը մեկ հարկի տակ հավաքեց կրթության, գիտության և շախմատի ոլորտների ներկայացուցիչների՝ քննարկելու շախմատի դերը կրթության մեջ և դրա ազդեցությունը երեխաների մտածողության, կենտրոնացման, որոշումների կայացման և այլ հմտությունների զարգացման վրա։

Գագաթնաժողովի շրջանակում անցկացված 2026 թվականի «Շախմատը կրթության մեջ» տարվա (FIDE Year of Chess in Education Awards) մրցանակաբաշխության ընթացքում Հայաստանի պետական մանկավարժական համալսարանն արժանացավ «Ակադեմիական առաջամարտիկ» (Academic Vanguard Award) մրցանակին։ 

Մրցանակը շնորհվել է Հայաստանի պետական մանկավարժական համալսարանում գործող «Շախմատ» գիտահետազոտական ինստիտուտի իրականացրած գիտական աշխատանքի, կրթական շախմատի ոլորտում ունեցած ներդրման, ինչպես նաև ապացույցների վրա հիմնված հետազոտությունների միջոցով ոլորտի կայուն զարգացմանը նպաստելու համար։ Մրցանակն ընդունել է «Շախմատ» գիտահետազոտական ինստիտուտի տնօրեն, միջազգային գրոսմայստեր Սմբատ Լպուտյանը։

Գագաթնաժողովի եզրափակիչ՝ «Շախմատի անցյալը, ներկան և ապագան կրթության մեջ» խորագրով հատվածը միավորեց կրթական շախմատի զարգացման տարբեր փուլերը ներկայացնող մասնագետների։ «Անցյալ» թեմատիկ պանելում հանդես եկավ Հայաստանում «Շախմատը դպրոցներում» ծրագրի դեսպան Արփինե Լպուտյանը՝ անդրադառնալով այն ճանապարհին, որով շախմատը Հայաստանում զարգացել է ոչ միայն որպես մարզաձև, այլև որպես կրթության մաս՝ ուսուցիչների պատրաստման, մեթոդաբանության և հետազոտությունների միջոցով։

Գագաթնաժողովը ևս մեկ անգամ ընդգծեց կրթական շախմատի զարգացման գործում գիտական հետազոտության, մանկավարժական փորձի և միջազգային համագործակցության կարևորությունը։