Սմբատ Լպուտյաը և Արմեն Գևորգյանը հետևեցին Արարատի մարզի պատանիների առաջնությանը
Մասիս քաղաքում շարունակվում է Արարատի մարզի պատանիների առաջնությունը, որը հանդիսանում է Հայաստանի պատանիների և աղջիկների առաջնության կիսաեզրափակիչ մրցաշարի ընտրական փուլ:
Մասիսի համայնքապետ Նորայր Հակոբյանը ջերմորեն հյուրընկալեց Հայաստանի շախմատի ակադեմիայի հիմնադիր-նախագահ, Հայաստանի շախմատի ֆեդերացիայի նախագահի առաջին տեղակալ Սմբատ Լպուտյանին և Հայաստանի շախմատի ֆեդերացիայի գործադիր տնօրեն Արմեն Գևորգյանին։
Հանդիպման ընթացքում քննարկվել է պատանիների մարզային առաջնության ընթացքը, ինչպես նաև Մասիս համայնքում շախմատի զարգացման առաջիկա ծրագրերը։
Այնուհետև պարոն Լպուտյանը և պարոն Գևորգյանը աշխատանքային հանդիպում են ունեցել Արարատի մարզի Հայաստանի շախմատի ակադեմիայի մասնաճյուղերի մարզիչների հետ։ Հանդիպմանը ներկա է եղել նաև Մասիս համայնքի ղեկավարի խորհրդական Ռուբեն Հովհաննիսյանը։
Արարատի մարզի շախմատի պատասխանատու Միքայել Մարտիրոսյանը ներկայացրել է մարզի ընդհանուր շախմատի զարգացմանը ուղղված աշխատանքները և հետագա անելիքները: Մարզիչները ներկայացրել են իրենց ծրագրերը և բարձրաձայնել առկա խնդիրները։
Հանդիպման ավարտին պարոն Լպուտյանը ներկայացրել է առաջիկա նախաձեռնությունները, տվել հանձնարարականներ և բարձր գնահատել մարզում իրականացվող աշխատանքները։
Քննարկումից հետո Սմբատ Լպուտյանն ու Արմեն Գևորգյանը Ռուբեն Հովհաննիսյանի ուղեկցությամբ այցելել են Մասիսի երաժշտական դպրոց, որտեղ հետևել են առաջնության ընթացքին և գոհունակություն հայտնել կազմակերպչական աշխատանքներից։
Արարատի մարզի շախմատի պատասխանատու Միքայել Մարտիրոսյանը շնորհակալություն է հայտնել Հայաստանի շախմատի ֆեդերացիային և Հայաստանի շախմատի ակադեմիային մշտական աջակցության համար։
Այլ նորություններ