ՖԻԴԵ-ն Աղասի Ինանցին պարգևատրել է հատուկ հուշամեդալով

Միջազգային տարբեր հարթակներում համաշխարհային և հայկական շախմատը տարիներ շարունակ լավագույնս ներկայացնելու, հայկական շախմատի զարգացման և հանրահռչակման մեջ վերջին 15 տարիներին ունեցած մեծ ավանդի՝ իր անձնական միջոցներով բազմաթիվ մրցաշարեր հովանավորելու, ինչպես նաև միջազգային տարբեր մրցաշարերում հայ շնորհալի շախմատիստների մասնակցությանը նպաստելու համար՝ ՖԻԴԵ-ի ղեկավարությունը Աղասի Ինանցին պարգևատրել է ՖԻԴԵ-ի հատուկ հուշամեդալով։ 



Ստորև ներկայացնում ենք Աղասի Ինանցի գործունեության համառոտ նկարագիրը.

ՀՀ սպորտի վարպետ, ՖԻԴԵ-ի վարպետ Աղասի Ինանցը կարևոր ներդրում ունի հայկական շախմատի զարգացման գործում։ Նա ընդգրկված է Հայաստանի շախմատի ֆեդերացիայի ղեկավար կազմի մեջ՝ հանդիսանալով խորհրդի անդամ։ Տարիներ շարունակ աշխատելով ինչպես Հայաստանում, այնպես էլ արտերկրում՝ մեծապես նպաստել է հայկական շախմատի հանրահռչակմանը։



Լինելով շախմատային մեդիայի աշխարհի առաջատար մասնագետներից մեկը՝ ՖԻԴԵ-ն և մյուս կազմակերպիչները 2011-2018թթ. ընթացքում Ինանցին վստահել են ամենապատասխանատու պաշտոններն այնպիսի հեղինակավոր մրցաշարերում, ինչպիսին են՝ շախմատի համաշհարհային օլիմպիադան, հավակնորդների մրցաշարը, ՖԻԴԵ-ի Գրան-պրիները, Աշխարհի թիմային, արագ և կայծակնային շախմատի առաջնությունները։





Զուգահեռաբար՝ 2012–2018 թթ. հեղինակել և վարել է Հայաստանի Հանրային հեռուստաընկերությամբ հեռարձակվող «Շախմատի աշխարհ» հաղորդաշարը։





Ինանցն իր անձնական միջոցներով հովանավորել է մրցաշարեր՝ «Ծաղկաձոր Օփեն», «Անդրանիկ Մարգարյանի հուշամրցաշար», «Հաշմանդամների աշխարհի առաջնություն», ինչպես նաև ապահովում է առաջատար երիտասարդների մասնակցությունը Ջերմուկում անցկացվող ամենամյա միջազգային մրցաշարին։



Վերջին տարիներին աջակցում է 8–18 տարեկան հայ շախմատիստներին Եվրոպայի և Աշխարհի անհատական առաջնություններում։ 



Աղասիի նվիրվածությունն ու հոգատարությունը դարձրել են նրան այս մրցանակի արժանի կրողը: Հուշամեդալը Աղասի Ինանցին հանձնել է Հայաստանի շախմատի ֆեդերացիայի գործադիր տնօրեն Արմեն Գևորգյանը՝ շախմատի միջազգային օրվան նվիրված միջոցառման շրջանակներում։